Almennir viðskiptaskilmálar

Almennt og gildissvið

PremierTrips, kt. 540225-1410, býður upp á ferðaþjónustu og miðasölu, meðal annars í tengslum við fótboltaleiki, tónleika, íþróttaviðburði og aðra viðburði.

Skilmálar þessir gilda um viðskipti við PremierTrips, þar á meðal kaup í Bókunarvélinni (áður kynnt sem pakkaferðir), hópaferðir, staka ferðatengda þjónustu, viðburðamiða og gjafabréf, sem og pantanir sem gerðar eru í kjölfar tilboðs eða fyrirspurnar, nema annað sé sérstaklega tekið fram eða samið skriflega.

Réttarstaða viðskiptavinar getur verið mismunandi eftir því hvort keypt er pakkaferð, stök ferðatengd þjónusta eða eingöngu aðgangsmiði að viðburði. Kaup í Bókunarvélinni geta talið til pakkaferðar. Þar sem um pakkaferð er að ræða gilda lög nr. 95/2018 um pakkaferðir og samtengda ferðatilhögun eftir því sem við á.

Ef ákvæði þessara skilmála stangast á við ófrávíkjanleg ákvæði laga ganga lögin framar skilmálunum.

Viðskiptavinur ber ábyrgð á að kynna sér skilmála þessa áður en bókun er staðfest.

Bókunarvélin

Bókunarvélin er sjálfsafgreiðsluþjónusta PremierTrips þar sem viðskiptavinur setur saman ferð með flugi, hóteli og/eða viðburðamiða eftir eigin vali, án fararstjóra. Þjónustan var áður kynnt undir heitinu pakkaferðir.

Kaup í Bókunarvélinni geta talið til pakkaferðar samkvæmt lögum nr. 95/2018 um pakkaferðir og samtengda ferðatilhögun. Þar sem lögin eiga við gilda þau um bókunina, óháð vöruheiti á vefnum.

Laugardagsleikir stóru liða geta færst á sunnudag vegna sjónvarpsútsendinga þar til mótshaldari hefur staðfest dagsetningu. PremierTrips mælir þá með heimferð á mánudegi. Nánar er fjallað um leikdagsbreytingar í kaflanum um viðburði og breytingar á leikdögum.

Bókun og samningsgerð

Við bókun skal viðskiptavinur veita réttar og fullnægjandi upplýsingar um alla ferðamenn sem bókunin nær til.

Nöfn ferðamanna skulu, þegar þess er krafist, vera skráð nákvæmlega eins og þau koma fram í vegabréfi eða öðrum gildum ferðaskilríkjum.

Viðskiptavinur ber ábyrgð á því að upplýsingar sem hann veitir séu réttar. Kostnaður sem kann að falla til vegna rangrar skráningar, nafnbreytinga eða annarra breytinga sem rekja má til rangra upplýsinga viðskiptavinar getur fallið á viðskiptavininn, að því marki sem lög heimila.

Bókun telst staðfest þegar viðskiptavinur hefur fengið staðfestingu frá PremierTrips og greitt þá greiðslu sem krafist er samkvæmt bókuninni.

Ef einn einstaklingur bókar fyrir fleiri ferðamenn telst hann tengiliður bókunarinnar og ber ábyrgð á að miðla nauðsynlegum upplýsingum, skilmálum og ferðagögnum til annarra ferðamanna í bókuninni.

Verð og greiðslur

Öll verð eru gefin upp í íslenskum krónum nema annað sé sérstaklega tekið fram.

Það sem er innifalið í verði kemur fram í lýsingu viðkomandi ferðar, pakka, miða eða tilboðs. Þjónusta sem ekki er sérstaklega tilgreind sem innifalin telst ekki hluti af kaupverði.

PremierTrips getur breytt verði á óseldum ferðum, miðum og þjónustu hvenær sem er.

Verðlækkun eða sérstakt tilboð sem birtist eftir að viðskiptavinur hefur staðfest kaup veitir ekki sjálfkrafa rétt til endurgreiðslu á mismuninum, nema þegar PremierTrips Verðvernd gildir samkvæmt grein 14A.

Verðbreytingar á staðfestri bókun úr Bókunarvélinni

Þegar kaup í Bókunarvélinni teljast pakkaferð gilda reglur laga nr. 95/2018 um verðbreytingar.

Verð staðfestrar pakkaferðar verður aðeins hækkað þegar heimild til þess er fyrir hendi samkvæmt lögum og skilmálum þessum, meðal annars vegna breytinga á:

• verði farþegaflutninga vegna eldsneytisverðs eða annarra orkugjafa,
• sköttum eða opinberum gjöldum sem lögð eru á ferðatengda þjónustu,
• gengi erlendra gjaldmiðla sem hafa áhrif á kostnað ferðarinnar.

Sama gildir um rétt ferðamanns til verðlækkunar þegar viðeigandi kostnaðarliðir lækka.

Tilkynning um verðhækkun skal send ferðamanni með skýrum hætti og innan þeirra tímamarka sem lög mæla fyrir um.

Greiðslufyrirkomulag

Greiðslufyrirkomulag getur verið mismunandi eftir ferð, viðburði eða tegund bókunar og kemur fram við kaup eða í tilboði.

Þegar miðakaup fara fram í gegnum fyrirspurnarferli sendir viðskiptavinur fyrirspurn og PremierTrips getur í kjölfarið sent persónulegt tilboð.

Sé þess krafist skal staðfestingargjald greitt innan þess frests sem kemur fram í greiðslubeiðni.

Í hefðbundnu fyrirspurnarferli getur greiðslufyrirkomulag til dæmis verið:

Annað greiðslufyrirkomulag getur þó komið fram í einstökum tilboðum eða við bókun og gildir þá það fyrirkomulag.

Ef greiðsla berst ekki innan tilgreinds frests getur PremierTrips, að undangenginni viðeigandi tilkynningu þegar þess er krafist, litið svo á að viðskiptavinur hafi fallið frá bókun. Um endurgreiðslu eða kostnað vegna slíkrar afpöntunar fer samkvæmt tegund bókunar, skilmálum hennar og gildandi lögum.

Ferðagögn

Eftir staðfestingu bókunar fær viðskiptavinur bókunarstaðfestingu og/eða önnur ferðagögn send rafrænt á það netfang sem gefið var upp við bókun.

Viðskiptavinur ber ábyrgð á að yfirfara ferðagögn þegar þau berast og tilkynna PremierTrips án tafar ef upplýsingar virðast rangar.

Ferðagögn geta meðal annars innihaldið upplýsingar um flug, hótel, viðburði, miða, brottfarartíma, tengiliði og aðra þjónustu sem tengist bókuninni.

Viðskiptavinur skal fylgjast með tölvupósti og öðrum samskiptaleiðum sem hann hefur gefið upp fram að ferð, þar sem mikilvægar breytingar eða upplýsingar kunna að berast með skömmum fyrirvara.

Flug og innritun

Farþegar bera ábyrgð á að mæta tímanlega til innritunar og brottfarar samkvæmt fyrirmælum viðkomandi flugfélags.

Reglur um innritun eru mismunandi milli flugfélaga. Viðskiptavinur skal fylgja reglum þess flugfélags sem annast flugið, meðal annars varðandi rafræna innritun, ferðaskilríki og mætingartíma.

Viðskiptavinur ber ábyrgð á að hafa gild ferðaskilríki og önnur gögn sem krafist er vegna ferðarinnar.

PremierTrips ber ekki ábyrgð á því ef farþegi missir af flugi vegna þess að hann mætir of seint, hefur ekki rétt ferðaskilríki eða uppfyllir ekki inngönguskilyrði ákvörðunarlands, nema atvik megi rekja til vanefnda PremierTrips.

Flugtímar og breytingar flugfélaga

Flugtímar geta breyst eftir að bókun hefur verið staðfest.

Viðskiptavinir skulu því fylgjast með upplýsingum frá PremierTrips og/eða viðkomandi flugfélagi.

Ef flugfélag breytir eða aflýsir flugi gilda réttindi farþega samkvæmt viðeigandi lögum og reglum auk þeirra réttinda sem kunna að leiða af lögum um pakkaferðir þegar flugið er hluti af pakkaferð.

Farangur

Farangursheimild fer eftir flugfélagi, fargjaldi og þeirri þjónustu sem keypt hefur verið.

Viðskiptavinur ber ábyrgð á að kynna sér hversu mikill farangur er innifalinn í bókun hans.

Kröfur vegna týnds, seinkaðs eða skemmds farangurs skulu almennt tilkynntar viðkomandi flugfélagi eins fljótt og unnt er og samkvæmt reglum þess.

Réttindi farþega vegna farangurs ráðast meðal annars af reglum viðkomandi flugfélags og gildandi alþjóðlegum og innlendum reglum.

Vegabréf, vegabréfsáritanir og ferðaleyfi

Viðskiptavinur ber ábyrgð á að hafa gilt vegabréf og önnur ferðaskilríki sem nauðsynleg eru vegna ferðarinnar.

Viðskiptavinur ber jafnframt ábyrgð á að kanna hvort hann þurfi vegabréfsáritun, rafrænt ferðaleyfi, sérstakt samþykki eða önnur gögn vegna áfangastaðar eða millilendingar.

Reglur geta verið mismunandi eftir ríkisfangi ferðamanns og geta breyst með skömmum fyrirvara.

PremierTrips mælir með því að ferðamenn staðfesti gildandi reglur hjá opinberum stjórnvöldum viðkomandi ríkis fyrir brottför.

ETA — rafrænt ferðaleyfi til Bretlands

Íslenskir ríkisborgarar sem ferðast til Bretlands þurfa almennt að hafa gilt rafrænt ferðaleyfi, Electronic Travel Authorisation (ETA), nema þeir falli undir undanþágu samkvæmt breskum reglum.

ETA er tengt við vegabréf viðkomandi ferðamanns.

Ferðamaður ber sjálfur ábyrgð á:

• að kanna hvort ETA sé nauðsynlegt,
• að sækja um það tímanlega,
• að nota rétt vegabréf við umsókn,
• að greiða viðeigandi umsóknargjald,
• og að uppfylla önnur inngönguskilyrði Bretlands.

Gjöld og reglur geta breyst og skal því ávallt kanna nýjustu upplýsingar á opinberum vef breskra stjórnvalda fyrir ferð.

PremierTrips ber ekki ábyrgð á því ef ferðamanni er synjað um brottför eða inngöngu vegna þess að hann hefur ekki nauðsynleg ferðaskilríki eða ferðaleyfi, nema slíkt megi rekja til vanefnda PremierTrips.

Hótel og gisting

Upplýsingar um hótel og gistingu koma fram í ferðalýsingu eða bókunarstaðfestingu.

Flokkun hótela, svo sem fjöldi stjarna, miðast almennt við flokkunarkerfi viðkomandi lands eða þjónustuveitanda og getur verið frábrugðin því sem ferðamenn eiga að venjast á Íslandi.

Herbergjategund og rúmaskipan fara eftir því sem fram kemur í bókun.

Séróskir, svo sem um samliggjandi herbergi, ákveðna hæð, útsýni eða rúmaskipan, eru háðar framboði nema PremierTrips hafi sérstaklega staðfest þær sem hluta samningsins.

Viðburðir og breytingar á leikdögum

Leikdagar og leiktímar geta breyst vegna sjónvarpsútsendinga, þátttöku liða í öðrum keppnum eða annarra aðstæðna. Dagsetning og tími við kaup eru því birt með fyrirvara um breytingar, sem geta orðið með stuttum fyrirvara.

Laugardagsleikir stóru liða geta sérstaklega færst á sunnudag vegna sjónvarpsútsendinga þar til mótshaldari hefur staðfest dagsetningu og tíma. PremierTrips mælir þá með heimferð á mánudegi. Viðskiptavinur ber ábyrgð á að velja heimferðardag með tilliti til þeirrar áhættu.

Kaupandi ber ábyrgð á að fylgjast með staðfestri leikjadagskrá á opinberri vefsíðu viðkomandi félags eða keppni. Ekki er hægt að treysta á að sérstök tilkynning berist frá PremierTrips.

Þegar dagsetning er staðfest gildir sú dagsetning. Færist leikur eftir það gildir miðinn á nýjum leikdegi samkvæmt reglum mótshaldara eða miðaveitanda. Breyting á leikdegi eða leiktíma veitir ekki sjálfkrafa rétt til endurgreiðslu eða skipta. Þetta skerðir þó ekki ófrávíkjanleg réttindi kaupanda samkvæmt lögum, þ.m.t. lögum nr. 95/2018 um pakkaferðir þegar kaup í Bókunarvélinni teljast pakkaferð.

Frestun eða aflýsing viðburðar

Ef viðburði er frestað gildir miðinn almennt áfram fyrir nýja dagsetningu samkvæmt reglum viðkomandi mótshaldara eða miðaveitanda.

Ef viðburði er aflýst með öllu fer réttur viðskiptavinar til endurgreiðslu eftir tegund kaupa, reglum mótshaldara eða miðaveitanda, skilmálum bókunarinnar og gildandi lögum.

Ef miði er hluti af pakkaferð geta jafnframt gilt sérstök réttindi samkvæmt lögum nr. 95/2018.

Viðburðamiðar

Miðar geta verið rafrænir miðar, farsímamiðar, aðgangskóðar, aðgangur í gegnum smáforrit, miðlar sem þarf að virkja eða annars konar aðgangsheimildir.

Miðar eru afhentir rafrænt í gegnum WhatsApp. Miðar eru alla jafna afhentir deginum fyrir viðburð en ef þeir hafa ekki borist a.m.k. 6 klst fyrir viðburð endilega heyrðu í okkur.

Viðskiptavinur ber ábyrgð á að fylgjast með tölvupósti og öðrum samskiptaleiðum sem gefnar voru upp við bókun.

PremierTrips verðvernd

Sjá einnig PremierTrips verðvernd.

PremierTrips Verðvernd er verðjöfnun á stökum miðakaupum. Hún er ekki vátrygging og ekki sérstakt greitt viðbótarþjónustugjald.

Verðvernd gildir aðeins um staka miðakaup (ekki pakkaferðir eða hópaferðir) og aðeins á viðburðum þar sem PremierTrips Verðvernd var auglýst við kaup.

Við kaup

Ef viðskiptavinur, áður en kaup ganga í gegn, sýnir fram á að sami miði sé ódýrari hjá skráðu íslensku miðasölufyrirtæki samkvæmt samanburðarreglum hér að neðan, jafnar PremierTrips verðið áður en greiðsla er lokið, að því leyti sem framlegð viðburðarins leyfir og innan hámarks í grein þessari.

Eftir kaup

Finnur viðskiptavinur sama miða ódýrari hjá skráðu íslensku miðasölufyrirtæki innan 14 daga frá kaupum, endurgreiðir PremierTrips mismuninn, að teknu tilliti til hámarks og skilyrða hér að neðan.

Krafa skal berast eigi síðar en 14 dögum eftir kaup og ekki síðar en 72 klukkustundum fyrir upphaf viðburðar. Ef 14 daga fresturinn næði inn fyrir 72 klukkustunda mörkin gildir styttri fresturinn.

Samanburðarhæfni

Samanburður miðast við:

• sama viðburð og sömu dagsetningu (eða sömu útgáfu viðburðarins),
• sama sæti eða sama sætisflokk / miðategund,
• sama fjölda miða,
• sama heildarverð með öllum gjöldum (ekki eingöngu grunnverð),
• að tilboðið sé raunverulega hægt að kaupa þegar krafa er metin.

Með „skráðu íslensku miðasölufyrirtæki“ er átt við aðila sem er skráður á Íslandi og selur miða löglega til neytenda á Íslandi. Erlendir söluaðilar og erlendar síður teljast ekki.

Undanþágur

Verðvernd gildir ekki um:

• einkasölur og lokuð tilboð,
• erlendar síður og erlenda söluaðila,
• afsláttarkóða, félagsverð og starfsmannaverð,
• pakkatilboð (t.d. flug, hótel eða önnur þjónusta innifalin),
• óstaðfestar auglýsingar eða verð sem ekki er hægt að kaupa.

Hámark endurgreiðslu

Endurgreiðsla takmarkast við lægra af 10% af greiddri miðaupphæð viðkomandi pöntunar eða 15.000 kr. á pöntun. Mismunur er reiknaður af heildarverði með gjöldum fyrir samanburðarhæfa miða.

Hvernig er krafa sett fram

Viðskiptavinur sendir kröfu í gegnum hafðu samband með bókunarnúmeri, skjáskotum eða tenglum á samanburðartilboðið og upplýsingum sem sýna að tilboðið hafi verið kaupanhæft. PremierTrips metur kröfu innan hæfilegs frests og getur óskað eftir frekari gögnum.

PremierTrips áskilur sér rétt til að hafna kröfu sem uppfyllir ekki skilyrði greinar þessarar eða er bersýnilega röng.

Sæti á viðburðum

Sætisflokkur eða staðsetning kemur fram við kaup eða í tilboði eftir því sem upplýsingar liggja fyrir.

Þegar ákveðinn hluti, röð eða sætisnúmer hefur ekki verið sérstaklega staðfest er ekki hægt að tryggja nákvæma staðsetningu innan viðkomandi miðaflokks.

PremierTrips ábyrgist aðeins að sæti séu saman þegar það hefur sérstaklega verið tekið fram í bókun eða tilboði.

Hugtök eins og „saman“, „hlið við hlið“ eða sambærileg hugtök skulu túlkuð í samræmi við upplýsingar sem koma fram við kaup og reglur viðkomandi viðburðar.

Viðskiptavinur skal lesa lýsingu miðaflokks vandlega áður en kaup eru staðfest.

Reglur á leikvangi og viðburðastað

Viðskiptavinir skulu fylgja reglum viðkomandi leikvangs, mótshaldara eða viðburðastaðar.

Þær geta meðal annars varðað:

Viðskiptavinur ber ábyrgð á að kynna sér viðeigandi reglur.

PremierTrips ber ekki ábyrgð á því ef viðskiptavini er synjað um aðgang vegna brota á reglum viðburðastaðar eða vegna háttsemi viðskiptavinar.

Afpöntun viðskiptavinar

Skilmálar um afpöntun ráðast af því hvaða þjónusta hefur verið keypt.

Bókunarvélin

Ferðamaður getur afpantað bókun úr Bókunarvélinni (pakkaferð) áður en hún hefst. PremierTrips kann þá að eiga rétt á sanngjarnri afpöntunarþóknun samkvæmt lögum nr. 95/2018.

Fjárhæð afpöntunarþóknunar tekur meðal annars mið af því hversu skömmu fyrir brottför afpöntun á sér stað og þeim kostnaði eða tekjumissi sem leiðir af afpöntuninni.

Þegar óvenjulegar og óviðráðanlegar aðstæður á áfangastað eða í næsta nágrenni hans hafa veruleg áhrif á framkvæmd pakkaferðar eða flutning farþega þangað getur ferðamaður átt rétt á afpöntun án afpöntunarþóknunar samkvæmt lögum.

Stakir miðar og önnur þjónusta

Um afpöntun stakra viðburðamiða eða annarrar þjónustu sem ekki telst pakkaferð fer eftir skilmálum viðkomandi kaupa, eðli þjónustunnar og gildandi lögum.

Breytingar að ósk viðskiptavinar

Óskir um breytingar á staðfestri bókun skulu berast PremierTrips skriflega.

PremierTrips mun leitast við að verða við breytingarbeiðnum en getur ekki ábyrgst að breyting sé möguleg.

Viðskiptavinur greiðir þann raunverulega kostnað sem leiðir af breytingunni eftir því sem heimilt er samkvæmt lögum, svo sem gjöld flugfélags, hótels, miðaveitanda eða annars þjónustuveitanda.

PremierTrips upplýsir viðskiptavin um kostnað áður en breyting er staðfest þegar þess er kostur.

Breytingar af hálfu PremierTrips

PremierTrips getur þurft að gera breytingar á ferð vegna aðstæðna sem koma upp eftir bókun.

Sé um pakkaferð að ræða verður farið með breytinguna samkvæmt lögum nr. 95/2018.

Ef veruleg breyting verður á megineinkennum pakkaferðar fær ferðamaður upplýsingar um breytinguna og þann frest sem hann hefur til að samþykkja hana eða afpanta ferðina.

Ef ferðamaður á rétt á endurgreiðslu samkvæmt lögum vegna slíkrar breytingar verður hún framkvæmd innan lögbundins frests.

Óvenjulegar og óviðráðanlegar aðstæður

Óvenjulegar og óviðráðanlegar aðstæður geta meðal annars verið náttúruhamfarir, alvarlegt veður, stríðsátök, hryðjuverk, veruleg öryggisógn, farsóttir, lokun flugvalla eða aðrar aðstæður sem aðili hefur ekki stjórn á og ekki hefði verið hægt að koma í veg fyrir afleiðingar þeirra með sanngjörnum ráðstöfunum.

Réttindi og skyldur PremierTrips og ferðamanns við slíkar aðstæður ráðast af eðli bókunarinnar og gildandi lögum.

Ekkert í þessum skilmálum takmarkar lögbundin réttindi ferðamanns vegna óvenjulegra og óviðráðanlegra aðstæðna.

Aflýsing úr Bókunarvélinni af hálfu PremierTrips

Ef PremierTrips aflýsir bókun úr Bókunarvélinni (pakkaferð) áður en hún hefst á ferðamaður rétt á endurgreiðslu í samræmi við gildandi lög.

PremierTrips getur í þeim tilvikum sem lög heimila aflýst slíkri ferð án greiðslu viðbótarskaðabóta, meðal annars vegna óvenjulegra og óviðráðanlegra aðstæðna eða þegar lögbundnum skilyrðum um lágmarksfjölda þátttakenda er ekki náð, enda sé ferðamanni tilkynnt um það innan viðeigandi tímamarka.

Ferðatryggingar og forföll

PremierTrips selur ekki sjálfkrafa forfallatryggingu eða ferðatryggingu með ferðum nema það sé sérstaklega tekið fram við bókun.

Viðskiptavinum er eindregið ráðlagt að hafa fullnægjandi ferðatryggingu og forfallatryggingu.

Slíkar tryggingar kunna meðal annars að veita vernd vegna veikinda, slysa, forfalla, tapaðs farangurs og annarra ófyrirséðra atvika.

Viðskiptavinur skal kynna sér tryggingavernd sína hjá tryggingafélagi eða kortafyrirtæki.

Börn og ferðamenn undir 18 ára aldri

Verðflokkun barna getur verið mismunandi eftir flugfélögum, hótelum, viðburðum og einstökum ferðum.

Sú aldursskilgreining sem birtist við viðkomandi bókun gildir.

Börn undir tveggja ára aldri fá almennt ekki eigið sæti í flugi nema sérstakt sæti sé keypt og reglur flugfélags heimili það.

Foreldrar og forráðamenn bera ábyrgð á börnum sem ferðast með þeim.

Ef barn ferðast án beggja forráðamanna kann að vera krafist sérstakrar heimildar eða gagna. Viðskiptavinur ber ábyrgð á að kanna slíkar kröfur fyrir brottför.

Sérþarfir og aðgengi

Viðskiptavinir sem þurfa sérstaka aðstoð vegna hreyfihömlunar, fötlunar, læknisfræðilegra þarfa eða annarra aðstæðna skulu upplýsa PremierTrips eins snemma og mögulegt er.

PremierTrips mun leitast við að koma upplýsingum og óskum til viðeigandi þjónustuveitenda en getur aðeins ábyrgst sérkröfur sem hafa verið sérstaklega samþykktar sem hluti af samningnum.

Gjafabréf

Gjafabréf PremierTrips eru rafræn inneign í íslenskum krónum sem nota má samkvæmt þeim skilmálum sem gilda um viðkomandi gjafabréf.

Eftir greiðslu eða handvirka útgáfu getur kaupandi fengið stafrænan gjafabréfskóða og PDF-skírteini.

Gildistími gjafabréfs kemur skýrt fram við kaup og á gjafabréfinu sjálfu.

Gjafabréf eru ekki greidd út í reiðufé nema lög mæli fyrir um annað.

Ef kaupverð þjónustu er hærra en inneign gjafabréfs greiðir viðskiptavinur mismuninn.

Ef kaupverð er lægra en inneign gjafabréfs helst eftirstöðvar inneignarinnar til síðari nota, að því marki sem kerfi og skilmálar viðkomandi gjafabréfs gera ráð fyrir því.

Um endurgreiðslu gjafabréfa, gildistíma og önnur réttindi neytenda fer ávallt samkvæmt gildandi lögum.

Kvartanir og vandamál meðan á ferð stendur

Ef vandamál kemur upp meðan á ferð stendur skal ferðamaður tilkynna PremierTrips eða viðkomandi þjónustuveitanda um það án ástæðulauss dráttar og gefa færi á að bæta úr vandanum þegar það er mögulegt.

Sé fararstjóri PremierTrips með í ferð skal fyrst leita til hans þegar við á.

Einnig má hafa samband við PremierTrips á premiertrips@premiertrips.is.

Ferðamaður skal eftir fremsta megni varðveita gögn sem tengjast kvörtun, svo sem ljósmyndir, kvittanir og samskipti við þjónustuveitendur.

Kvartanir eftir ferð skulu berast PremierTrips skriflega eins fljótt og unnt er.

Ábyrgð PremierTrips

Ábyrgð PremierTrips fer eftir eðli þeirrar þjónustu sem keypt er og gildandi lögum.

Þegar PremierTrips er skipuleggjandi pakkaferðar ber fyrirtækið ábyrgð á framkvæmd þeirrar ferðatengdu þjónustu sem samningur um pakkaferð tekur til samkvæmt lögum nr. 95/2018.

Þegar PremierTrips kemur eingöngu fram sem milligönguaðili eða selur staka þjónustu kann ábyrgð að ráðast af öðrum reglum og skilmálum viðkomandi þjónustuveitanda.

Ekkert í þessum skilmálum skal túlkað þannig að lögbundin og ófrávíkjanleg réttindi neytenda séu felld niður eða takmörkuð.

Persónuupplýsingar

PremierTrips vinnur persónuupplýsingar viðskiptavina í þeim tilgangi að framkvæma bókanir, veita keypta þjónustu, sinna þjónustu við viðskiptavini og uppfylla lagalegar skyldur fyrirtækisins.

Nauðsynlegt getur verið að miðla upplýsingum til flugfélaga, hótela, miðaveitenda, mótshaldara, greiðsluþjónustuaðila eða annarra þjónustuveitenda sem koma að framkvæmd bókunarinnar.

Nánari upplýsingar um vinnslu persónuupplýsinga er að finna í persónuverndarstefnu PremierTrips.

Samskipti

Viðskiptavinur samþykkir að samskipti vegna bókunar geti farið fram rafrænt, meðal annars með tölvupósti, SMS-skilaboðum eða öðrum samskiptaleiðum sem viðskiptavinur hefur gefið upp.

Viðskiptavinur ber ábyrgð á að tengiliðaupplýsingar hans séu réttar og að tilkynna PremierTrips ef þær breytast.

Villur í verði og upplýsingum

PremierTrips leggur áherslu á að upplýsingar og verð á vef fyrirtækisins séu rétt.

Augljósar prentvillur, tæknivillur eða bersýnilega rangt verð sem sanngjarnt er að ætla að viðskiptavinur hafi mátt gera sér grein fyrir bindur PremierTrips ekki að því marki sem gildandi lög heimila.

Ef villa kemur í ljós eftir bókun verður viðskiptavinur upplýstur eins fljótt og unnt er og málið leyst í samræmi við gildandi lög.

Framsal bókunar

Þegar um pakkaferð er að ræða getur ferðamaður, með þeim skilyrðum sem lög nr. 95/2018 setja, framselt samninginn til annars einstaklings sem uppfyllir skilyrði ferðarinnar.

Tilkynna skal PremierTrips um framsal með hæfilegum fyrirvara.

Viðskiptavinur kann að þurfa að greiða þann raunverulega og sanngjarna kostnað sem hlýst af framsalinu.

Takmarkanir flugfélaga, miðaveitenda eða annarra þjónustuveitenda geta haft áhrif á möguleika á nafnbreytingum.

Lög og úrlausn ágreinings

Um viðskipti við PremierTrips gilda íslensk lög, eftir því sem við á.

Komi upp ágreiningur skulu aðilar fyrst leitast við að leysa hann með samskiptum sín á milli.

Viðskiptavinur getur jafnframt leitað til viðeigandi úrskurðar- eða eftirlitsaðila þegar slíkur réttur er fyrir hendi samkvæmt lögum.

Um varnarþing og meðferð dómsmála fer samkvæmt gildandi íslenskum lögum.

Breytingar á skilmálum

PremierTrips áskilur sér rétt til að uppfæra þessa skilmála eftir því sem rekstur, þjónusta eða lög og reglur breytast.

Sú útgáfa skilmála sem gilti þegar bókun var staðfest gildir almennt um viðkomandi bókun, nema breyting sé gerð vegna ófrávíkjanlegra lagareglna eða sé viðskiptavini til hagsbóta.

Tengiliðaupplýsingar

Spurningar varðandi bókanir, ferðir, miða eða þessa skilmála má senda á:

Nánari upplýsingar um meðferð persónuupplýsinga er að finna í persónuverndarstefnu PremierTrips.

Síðast uppfært: október 2026.